تحديث 1....رد الزين
تحديث 2... رد على الرد
تحديث3...رد الزين على الرد
تحديث 4 ... رد على الرد
اي تحديث بعد ذلك يعتبر غير دستوري
انطلاقا من مبدأ المساواة
والتي هيهات ان تطبق هيهات
اليكم هذه الكليمات
في الوجدانيات
..........
كل شي انتهى
يللي سكنتي خاطري
وفي اقصى قلبي
والحشا
كل شي انتهى
لا تشتكين
انا اعترف
كنتِ وجودي وكل شي
وكنت بكلماج انتشي
اسرح ... في ذرات الهوا
مجروح .... و انتِ لي الدوا
افرح ... وانت من طوى
حزني الكبير
لا تشتكين
انا اعترف
انت الحياة ... بحلوها
وآنه التعاسة ... بمرها
انت الامل
وآنه اللي ضيعت الامل
انت مراسي دمعتي
في وسطها ... لجفني .. وطن
انت بحياتي شمعتي
في ضوها .... قلبي سكن
لا تشتكين
آنه اعترف
انت اللي فيج ابتدا
لي كل شي
وانت اللي عندج ينتهى
لي كل شي
انت اللي بعيونج كتبت
كل قصتي
انتي اللي في قلبج زرعت
ورد جنتي
وانه معاج دوم نختلف
و طبيعي لازم نختلف
اش فايدة النور في النهار...
لو ما الظلام... ما كانت انوارج تلق
وآنه الظلام
الي يكحل كحلتج
وانت الكلام
لو ما الخصام
شلون القلوب تحترق
لو ما انا
من له تقولين ...
نفترق
لاني عليج انه اخاف
من نفسي
مو من اي شي
خل نفترق
............
قد تعلم غدا ما تجهله اليوم
حكمة يوغزلندية
........
رد .... الزين
ياللي زمانك ينتظر صحوة زماني
هاك الأماني ليه صفت منها الأماني
واملا زبيلك من شقا وطعم الحياة
ماهي نهاية قصتك في خاطري وتبقى الحياة
يوم(ن) تشكى خاطرك من خاطري
يوم(ن) عتب بحوش قلبك واعترف
يوم التوى صوت الحنين وانشلع
ومابقى غير حسي اللي انبلع
بشوفتك ... بخطوتك ... تخطي يمين .. تنحي شمال
منهو اللي قال آنا اعترف
منهو تشكي من التعب
وانا الحياة بحلوها ومرها
وانت اللي ثملت بشربها
آنا الأمل
إيه الأمل
آنا السما ... وبصدري بدرك اكتمل
وماني مراسي لدمعتك
آنا الضوى بشمعتك
ماني الم .. ماني عذاب
آنا لروحك سكنتك
آنا النسيم بهب السعد
اوصف بعد!!
26/11/08
02:09 م
........
رد على الرد
لا توصفين...
كافي ... وبعد لا توصفين
انا اوصفج
انت الهوى ... اتنسمه
انت السما
انت اللي لي شح السحاب
مطره تداوي علتي
وبلسمه
ياسديرتي
لو تنطقين
بحلفج منهو اللي روى
من دمعته ارض تربتج
منهو اللي صاغ كنارتج
من مبسمه
منهو اللي خلى شوكتج
متبسمه
لا توصفين ... انا اوصفج
انت اللي ابليس غوى ...
من فتنتج
طب وهوى
يدوّر .... يسأل عن دوا
يللي فتنتي الفتون
يلي تلاحقها العيون
قولي لي انا من اكون
يم فتنتج
لا توصفين ... انا اوصفج
انت الزمان لاجل المكان
انت المكان حق الزمن
انت الثواني بنبضها
لي وقفوا نبض الزمن
انت شراع قلوبنا
يوم بحرت وسط المحن
انت سفينة دمعتي
تحملها لي من غير ثمن
انت الكلام كله يعي يوصفج
انت الكلام ....
لا ...انت اكبر من الكلام
بس ...
مجبور انا اعترف
تدرين وادري بنفترق *
تدرين قلبي بيحترق
حنا اتفقنا بكل شي
الا الزمان
عيا الزمان
لانتفق
و لاني عليج
انه اخاف
من نفسي
لازم نفترق
27/11/08
03:53 م
......
* كلمات عبدالرحمن بن مساعد
........
رد الزين
تبي نفترق!!
خل نتفق
إنت وآنا
خلنا نعاند قلبنا
خلنا انتحدى شوقنا
كافي كلام .....أبغى فعل
كافي تقولب بالهوى مثل الحمام
هنا ........ وهنا
وإنت تقول آنا الهوى
وكيف الهوى يصبح هبوب
وإنت الذي بساعة صفا بحبي تذوب
وسديرتك آنا اكون
وكيف الخضار لغصنها يقدر يخون
وكيف الدموع تصبح سراب يروي التراب
مو آنا تفاحتك
اللي بها ابليس لآدم وحوا غوا
مو آنا فتنتك ... دنيتك وجنتك
مو آنا مجنونتك اللي استوت لجروحك دوا
جاوب ورد ليش الهجر
ليش الهروب
وكل هالوصوف وكل هالشعر فيني تقول
ارجع ترى
ما عاد فيني اكتمل مثل البدر وإنت بعيد
وشراعي آنا عيا يعلي ويرتفع
وقليبي انا دونك إنت ماهو سعيد
جيب الزمن لعندي ورا
خله يعيد كل الكلام
يخله يداوي كل الجروح ويكفي ملام
خله يزين الأحلام بحلمي أنا
واجلس معاي بجنبي هنا
خلنا نحاكي فرحنا
لا تبتعد
لا نفترق
خل الكلام عنك بعيد
واشرب معي كاس الهنا
انت تبغي منا نفترق
نب نحترق ... ونصبح رماد
والله حرام
لا ترمي قلبك بالثري
مهما جرى
آنا لغيرك ما استوى
مهما جرى
ارحم قلب(ن) حن لك
لا تهلكه بعز الغرام
يكفي ملام
قرب هنا
اترك معي كل الكلام
خلني معك
ولا نفترق
27/11/08
18:10
........
رد على الرد
هي كلمتين
وباختصار
الحب مو كل شي
وما تجتمع جنة ونار
:)
27/11/08
20:55
المشاركات
