ان لم تكن قد قراته
......
حدثني صديق بموقف مع ابنته والحوار الذي دار بينهما
يقول الصديق
دخلت عليّ ابنتي وأنا بالمطبخ
وبيدي خبزة وكاس من اللبن
ودار الحوار التالي :
هي : يبا شتسوي ؟
هو : أتعشى يا بنيتي
هي : كل هالخير بالبيت و تتعشى خبز ولبن
إذا مو يايز لك أكل البيت
اتصل بأي مطعم أو بالنت من ايت اون لاين
اييب لك اللي تبيه من مطاعم الدرجة الأولى بعد
هو : ومن قالج أبي أكل من مطعم درجة أولى أو ثانية
ومن قالج انه مو يايز لي عشا البيت ... كله خير ونعمة يا بابا
هي : عيل ليش جذي ؟
هو : حبيبتي لازم بين وقت و وقت نوقف النفس عن حدها
ما نعطيها كل اللي تبي حتى وان كان موجود ومتوفر
النفس ما تشبع وكل ما عطيتيها تبي زود
هي : و ليش ما نعطيها إذا عندنا ؟
هو : إذا عطيناها ... لي وين راح تودينا ؟ ما ندري طبعا
هي : شلون يبا إذا إحنا انعرف الصح من الغلط ممكن نوقفها عند حدها
هو : يا بنيتي مو شرط نوقفها عند الغلط بس
لازم نتعود نوقفها متى ما نبي حتى لو مو غلط
لان إذا ما عودناها ساعتها حتى عند الغلط ما راح نشوف الغلط
هي : مو لي هالدرجة
هو : افترضي إن عندج 100 مليون دينار
هي : جان زين الله يسمع منك
هو : لا تستعجلين على رزقج
ابيج تجاوبيني بصراحة بعد ما تفكرين عدل وتجاوبيني بأمانه
أقول افرضي إن عندج المبلغ
هل أنت مستعدة تدفعين سنويا مليونين ونص مليون دينار زكاة ؟
هي باستغراب : شنو ؟ مليونين ونص ؟
هو : أي
هي : تبي الصج يبا ما يبيلها تفكير
بصراحة صعبة وايد ...استغفر الله ربي العظيم
مليونين ونص كل سنه
استغفر الله استغفر الله ...وااايد
هو : شفتي شلون !!
هذا افتراض وأنت هذا رايج شلون لو صج
عرفتي ليش النفس يبيلها الواحد يوقفها عند حدها
هو : لوعندج المبلغ اشتشغلين ؟
هي ضاحكة : أي شغل يبا لقعد أمتع نفسي بالفلوس
ولا أسوي شي غير السفر و الوناسة
هو : شوفي حواليج ...فلان وفلان و فلان
وبكل مكان في العالم ... جم يملكون
هي : مليارات
هو : شلون شايفه من حالهم ؟
هي : جنهم بشقا و ماذين نفسهم وما أظنهم مرتاحين
يبون يصيرون ويبون يسون ...ويبون
وكل يوم بالجرايد عندهم قصة أو سالفة
هو : أي ...ما يخلصون من اللي يبونه
لان النفس منطلقة وما تقنع بشي من تحصل على شي تبي اكبر منه
هي : يبا هذا مو طموح ؟
هو : لا ... مو طموح اللي ما يخلي الإنسان يعيش مرتاح و
في شقا وهم دايم رغم إن عنده الملايين .
هي : بس في ناس مو جذي
عندهم خير ومرتاحين
هو : صحيح سواء من عنده خير او على قد حاله
يقدر يعيش مرتاح اذا وقف نفسه عند حد معين
المشاركات
